ໝວດທີ VI
ວ່າດ້ວຍລະບຽບຜູ້ຕາງໜ້າສະມາຄົມ ການສຶກສາພາກເອກະຊົນ ປະຈຳແຂວງ
ມາດຕາ 50: ຜູ້ທີ່ມີສິດສະໝັກເລືອກຕັ້ງ ເປັນຜູ້ຕາງໜ້າສະມາຄົມ ການສຶກສາພາກເອກະຊົນ ປະຈຳແຂວງ ຕ້ອງມີເງື່ອນໄຂດັ່ງນີ້:
- ຕ້ອງເປັນສະມາຊິກສາມັນ ຂອງສະມາຄົມ ການສຶກສາພາກເອກະຊົນ ຢ່າງຕ່ຳບໍ່ຫຼຸດ 2 ປີຂຶ້ນໄປ
- ຕ້ອງມີທັດສະນະຫຼັກໝັ້ນ ທາງດ້ານການເມືອງ, ມີມະນຸດສຳພັນດີ ແລະ ມີອາຍຸ ບໍ່ຫຼຸດ 30 ປີຂຶ້ນໄປ.
- ຕ້ອງມີຄວາມຮູ້ ຄວາມສາມາດ ແລະ ປະສົບການ ທາງດ້ານການບໍລິຫານ ສະຖານການສຶກສາ
- ຕ້ອງເປັນຜູ້ທີ່ສາມາດເຕົ້າໂຮມຄວາມສາມັກຄີໄດ້ດີ
- ຕ້ອງແມ່ນຜູ້ທີ່ມີຄວາມສົນໃຈ ແລະ ເຂົ້າຮ່ວມໃນກິດຈະກໍາຕ່າງໆ ຂອງສະມາຄົມ ຢ່າງເປັນປົກກະຕິ ເຊັ່ນ: ເຂົ້າຮ່ວມ ກອງປະຊຸມ ສໍາມະນາ, ເຂົ້າຮ່ວມກິດຈະກໍາ ເພື່ອສັງຄົມ, ເຂົ້າຮ່ວມກິດຈະກໍາ ເພື່ອການສຶກສາ ແລະ ກິດຈະກຳອື່ນໆ ທີ່ສະມາຄົມຈັດຂຶ້ນ.
- ຕ້ອງແມ່ນຜູ້ທີ່ຫ້າວຫັນໃນການເຮັດວຽກ, ມີແນວຄິດສ້າງສັນ ແລະ ມີເວລາພຽງພໍໃຫ້ກັບວຽກງານຂອງສະມາຄົມ
- ຕ້ອງມີຄຸນນະທຳ ແລະ ບໍ່ເຄີຍສ້າງຄວາມເຊື່ອມເສຍ ຕໍ່ພາບພົດ ແລະ ກຽດຊື່ສຽງ ຂອງສະມາຄົມມາກ່ອນ
- ຕ້ອງແມ່ນຜູ້ທີ່ມີຄວາມເສຍສະຫຼະ ແລະ ມີຜົນງານໃນການປະກອບສ່ວນ ໃນການຊ່ວຍເຫຼືອສັງຄົມ
- ຕ້ອງມີສຸຂະພາບຈິດ ແລະ ສຸຂະພາບກາຍດີ
ມາດຕາ 51: ວິທີການເລືອກຕັ້ງ ເອົາຜູ້ຕາງໜ້າສະມາຄົມ ການສຶກສາພາກເອກະຊົນ ປະຈຳແຂວງ
- ຄະນະບໍລິຫານງານສະມາຄົມ ການສຶກສາພາກເອກະຊົນ ຂັ້ນສູນກາງ ສາມາດແຕ່ງຕັ້ງຜູ້ຕາງໜ້າຊົ່ວຄາວ ປະຈຳຢູ່ແຂວງ ເພື່ອເປັນຜູ້ຊ່ວຍໃນການ ເຄື່ອນໄຫວເຕົ້າໂຮມ ເອົາສະມາຊິກ ສະຖານການສຶກສາພາກເອກະຊົນ ເຂົ້າເປັນສໍາມາຊິກສົມບູນ
- ຄະນະບໍລິຫານງານສະມາຄົມ ການສຶກສາພາກເອກະຊົນ ຂັ້ນສູນກາງ ເປັນຜູ້ສະເໜີ ກົມຄຸ້ມຄອງການສຶກສາ ເພື່ຶອ ຂໍອະນຸຍາດເປີດ ກອງປະຊຸມ ເລືອກຕັ້ງເອົາຜູ້ຕາງໜ້າ ສ.ກ.ອ ປະຈຳແຂວງ
- ການດຳເນີນການເລືອກຕັ້ງ ແມ່ນຄືກັບ ການເລືອກຕັ້ງເອົາຄະນະບໍລິຫານງານຂອງສະມາຄົມ ການສຶກສາ ພາກເອກະຊົນ ຢູ່ຂັ້ນສູນກາງ.
ມາດຕາ 52: ຄະນະບໍລິຫານງານ ຂອງຜູ້ຕາງໜ້າສະມາຄົມ ການສຶກສາພາກເອກະຊົນ ປະຈຳແຂວງ ປະກອບດ້ວຍ:
- ຜູ້ຕາງໜ້າ 1 ຄົນ
- ຮອງຜູ້ຕາງໜ້າ 1 ຫາ 3 ຄົນ ( ສຸດແລ້ວແຕ່ຄວາມເໝາະສົມ ) ເພື່ອຮັບຜິດຊອບວຽກງານ ສາຍສາມັນ, ສາຍອາຊີວະ ແລະ ສາຍການສຶກສາຊັ້ນສູງ
- ເລຂາທິການ 1 ຄົນ ( ເພື່ອຮັບຜິດຊອບ ການເງິນ, ການບັນຊີ, ວຽກງານພົວພັນ, ການກວດກາ, ສີລະປະ, ກິລາ, ການປະຊາສຳພັນ ເຜີຍແຜ່ ແລະ ກິດຈະກຳຕ່າງໆ )
ຖ້າເຫັນວ່າມີຄວາມຈຳເປັນ ສາມາດປະກອບໃຫ້ມີກຳມະການຊ່ວຍວຽກຕື່ມອີກກໍ່ໄດ້.
ມາດຕາ 53: ພາຍຫຼັງການເລືອກຕັ້ງຜູ້ຕາງໜ້າສະມາຄົມ ປະຈຳແຂວງແລ້ວ ຄະນະບໍລິຫານງານສະມາຄົມ ການສຶກສາພາກເອກະຊົນຂັ້ນສູນກາງ ຈະນຳສະເໜີ ກະຊວງສຶກສາທິການ ເພື່ອອອກໃບແຕ່ງຕັ້ງ ຢ່າງເປັນທາງການ. ສຳລັບການແຕ່ງຕັ້ງ ກຳມະ ການ ຊ່ວຍວຽກນັ້ນ ແມ່ນຄະນະບໍລິຫານງານສະມາຄົມ ເປັນຜູ້ອອກໃບແຕ່ງຕັ້ງ ຕາມການສະເໜີ ຂອງຜູ້ຕາງໜ້າ ສະມາຄົມ ປະຈຳແຂວງ.
ມາດຕາ 54: ໄລຍະເວລາການດໍາເນີນງານ ຂອງຜູ້ຕາງໜ້າສະມາຄົມ ການສຶກສາພາກເອກະຊົນ ປະຈຳແຂວງ ມີກຳນົດ ຕາມອາຍຸການຂອງ ຄະນະບໍລິຫານງານ ສະມາຄົມ ການສຶກສາພາກເອກະຊົນ ຂັ້ນສູນກາງ ໃນແຕ່ລະຊຸດ ( ກຳນົດ 4 ປີ ).
ມາດຕາ 55: ບັນດາສະຖານການສຶກສາ ພາກເອກະຊົນ ຢູ່ຕ່າງແຂວງ ທີ່ເປັນສະມາຊິກຂອງສະມາຄົມ ຕ້ອງປະຕິບັດຕາມລະບຽບລວມຂອງ ສະມາຄົມ ການສຶກສາພາກເອກະຊົນ ເຊິ່ງກະຊວງສຶກສາທິການ ໄດ້ອະນຸມັດໄວ້ ພາຍໃຕ້ການປະສານງານ ແລະ ການຄຸ້ມຄອງດູແລ ຂອງຜູ້ຕາງໜ້າ ສະມາຄົມ ການສຶກສາ ພາກເອກະຊົນ ປະຈຳແຂວງ.
ມາດຕາ 56: ຜູ້ຕາງໜ້າ ສະມາຄົມ ການສຶກສາ ພາກເອກະຊົນ ປະຈຳແຂວງ ຕ້ອງດຳເນີນການເຄື່ອນໄຫວ ພາຍໄຕ້ຂອບເຂດ ກົດລະບຽບລວມ ຂອງສະມາຄົມ ແລະ ຕາມແຜນການເຄື່ອນໄຫວປະຈຳປີ ຂອງສະມາຄົມ, ຍົກເວັ້ນກອງປະຊຸມໃຫຍ່, ກອງປະຊຸມປະຈຳປີ ແລະ ກອງປະຊຸມສຳຄັນ ເຊິ່ງສະມາຊິກທັງໝົດໃນທົ່ວປະເທດ ຈະຕ້ອງໄປຮ່ວມປະຊຸມ ຢູ່ບ່ອນດຽວກັນ.
ມາດຕາ 57: ຜູ້ຕາງໜ້າ ສະມາຄົມ ການສຶກສາ ພາກເອກະຊົນ ປະຈຳແຂວງ ຕ້ອງສະເໜີແຜນການ ແລະ ລາຍງານການເຄື່ອນໄຫວປະຈຳປີ ຂອງຕົນ ໃຫ້ຄະນະບໍລິຫານງານ ສ.ກ.ອ ຂັ້ນສູນກາງຊາບ.
ມາດຕາ 58: ເງິນບໍາລຸງສະມາຄົມ ຂອງສະມາຊິກ ປະຈຳແຂວງ ໃຫ້ປະຕິບັດດັ່ງນີ້:
- ການເກັບເງິນບຳລຸງປະຈຳປີ ແມ່ນໃຫ້ເກັບເດືອນກັນຍາ ( ເດືອນ 9 ) ຂອງທຸກໆປີ
- ສຳລັບສະມາຊິກໃໝ່ ໃຫ້ຄິດໄລ່ ໂດຍເອົາເງິນບໍາລຸງ 1 ປີ ຫານໃຫ້ 12 ເດືອນ ແລ້ວຄູນໃຫ້ ຈຳນວນເດືອນ ທີ່ຍັງເຫຼືອ ກ່ອນຮອດເດືອນກັນຍາ ( ເດືອນ 9 ).
- ໃຫ້ຕາງໜ້າສະມາຄົມ ການສຶກສາພາກເອກະຊົນ ປະຈຳແຂວງ ແບ່ງເອົາ 60% ຂອງຈຳນວນເງິນ ບຳລຸງທັງໝົດ ເພື່ອໃຊ້ ໃນການເຄື່ອນໄຫວປະຈໍາປີ ແລະ ແບ່ງອອກ 40% ໃຫ້ສະມາຄົມການສຶກສາ ພາກເອກະຊົນ ຢູ່ສູນກາງ ເພື່ອໃຊ້ໃນການຈັດກອງປະຊຸມໃຫຍ່, ກອງປະຊຸມແລກປ່ຽນບົດຮຽນ, ກອງປະຊຸມເຜີຍແຜ່ ແລະ ກອງປະຊຸມສຳຄັນຕ່າງໆ ສຳລັບ ສະມາຊິກທັງໝົດ ໃນທົ່ວປະເທດ.