ໝວດທີ V
ວ່າດ້ວຍການເງິນຂອງສະມາຄົມ
ມາດຕາ 44: ສະມາຄົມມີລາຍຮັບຈາກ:
- ເງິນບຳລຸງ ຂອງສະມາຊິກສາມັນ
- ເງິນອຸດໜູນ ຫຼື ວັດຖຸອຸປະກອນ ຂອງລັດ ຕາມຄວາມສາມາດຕົວຈິງ
- ເງິນຊຸກຍູ້ ຈາກສະມາຊິກສະໜັບສະໜູນ ແລະ ສະມາຊິກກິດຕິມະສັກ
- ຂອງຂັວນ ຫຼື ທືນຊ່ວຍເຫຼືອ ອຸດໜຸນ ຈາກບຸກຄົນ ຫຼື ອົງການຈັດຕັ້ງຕ່າງໆທັງພາຍໃນ ແລະ ຕ່າງປະເທດ
- ການເຄື່ອນໄຫວຫາລາຍໄດ້ ຂອງສະມາຄົມ ທີ່ບໍ່ມີລັກສະນະທຸລະກິດ ແລະ ບໍ່ຂັດກັບກົດໝາຍ, ດຳລັດ ແລະ ລະບຽບຫຼັກການຕ່າງໆທີ່ປະກາດໃຊ້ຢູ່ ສ.ປ.ປ. ລາວ.
ມາດຕາ 45: ການຮັບເງິນ
- ສະມາຊິກສາມັນ ຕ້ອງໄດ້ຈ່າຍເງິນບຳລຸງ ໃຫ້ສະມາຄົມ ປີລະໜຶ່ງເທື່ອ ຕາມອັດຕາ ຂອງແຕ່ລະສາຍ ທີ່ໄດ້ຕົກລົງກັນໄວ້ ເຊັ່ນ: ສາຍສາມັນສຶກສາ, ສາຍອາຊີວະ ແລະ ສາຍການສຶກສາຊັ້ນສູງ. ສະມາຊິກຂອງແຕ່ລະສາຍ ຕ້ອງໄດ້ເສຍເງິນບຳລຸງ ໃນໄລຍະເລີ້ມຕົ້ນສົກຮຽນໃໝ່ ຄື ໃນເດືອນ ກັນຍາ (9) ຢ່າງຊ້າບໍ່ໃຫ້ກາຍວັນທີ 15 ຂອງ ເດືອນກັນຍາ ຂອງທຸກໆປີ.
- ສະມາຊິກສະໜັບສະໜູນ ແລະ ສະມາຊິກກິດຕິມະສັກ ຈ່າຍເງິນຊຸກຍູ້ຕາມເງື່ອນໄຂຕົວຈິງ
ມາດຕາ 46: ລະບຽບການຈ່າຍເງິນ
ອີງຕາມຄວາມຈຳເປັນ ໃນການກຳນົດປະລິມານການຈ່າຍເງິນ ໃຫ້ຖືກຕ້ອງ, ຈະແຈ້ງ ແລະ ໄປຕາມຂອບເຂດ ຄວາມຮັບຜິດຊອບ ຈຶ່ງກຳນົດການຈ່າຍເງິນດັ່ງນີ້:
- ການຈ່າຍເງິນຕ້ອງນອນຢູ່ໃນແຜນການລວມປະຈຳປີ ຂອງສະມາຄົມ ແລະ ແຜນການເຄື່ອນໄຫວ ຂອງແຕ່ລະສາຍ ທີ່ໄດ້ຮັບການອະນຸມັດ ຈາກກອງປະຊຸມຄະນະບໍລິຫານງານ
- ບໍ່ອະນຸຍາດໃຫ້ສະມາຊິກ ຢືມເງິນໄປເຄື່ອນໄຫວ ຫຼື ຈ່າຍໃນວຽກງານສ່ວນຕົວ ເຊິ່ງບໍ່ກ່ຽວຂ້ອງກັບ ການເຄື່ອນໄຫວວຽກງານ ຂອງສະມາຄົມ
- ໃນການຈ່າຍເງິນທຸກຄັ້ງຕ້ອງປະຕິບັດດັ່ງນີ້:
ກ). ຈຳນວນເງິນແຕ່ 300,000. ກີບລົງມາ ແມ່ນມອບໃຫ້ຫົວໜ້າບັນຊີ ແລະ ການເງິນ ສົມທົບກັນ ແຕ່ຕ້ອງລາຍງານ ໃຫ້ຄະນະປະຈໍາ ຮັບຊາບນຳທຸກຄັ້ງ ຫຼັງຈາກຈ່າຍ ພ້ອມທັງແຈ້ງໃບຮັບເງິນສູ່ກອງປະຊຸມ ຂອງຄະນະບໍລິຫານງານ ຂອງ ສະມາຄົມຊາບນຳ
ຂ). ຈຳນວນເງິນຫຼາຍກວ່າ 300,000. ກີບຂຶ້ນໄປ ຕ້ອງຂໍອະນຸມັດ ຈາກປະທານ ຫຼື ຄະນະປະຈຳ
ຄ). ນາຍຄັງ ປະເງິນໄວ້ໃນຄັງຕ່ຳສຸດ 300,000. ກີບ ແລະ ສູງສຸດບໍ່ເກີນ 500,000. ກີບ ແຕ່ຕ້ອງແຈ້ງໃຫ້ນາຍບັນຊີ ຊາບນຳ, ສ່ວນທີ່ເຫຼືອນັ້ນ ເງິນຂອງສະມາຄົມ ຕ້ອງເອົາຝາກໄວ້ໃນທະນາຄານ.
ງ). ໃນການຈ່າຍເງິນທຸກຄັ້ງ ຕ້ອງມີໃບຢັ້ງຢືນການຈ່າຍ ແລະ ຕ້ອງເຮັດໃບສະຫຼຸບ ທາງດ້ານການເງິນ ແລະ ບັນຊີ ຢ່າງຖືກຕ້ອງ ແລະ ເປັນລະບົບ.
ມາດຕາ 47: ການຈ່າຍເງິນ
ເງິນຂອງ ສ.ກ.ອ, ຈະຈ່າຍໃນການເຄື່ອນໄຫວ ທີ່ຈຳເປັນຕ່າງໆ ຕາມຈຸດປະສົງ ແລະ ແຜນການ ຂອງສະມາຄົມ ກໍ່ຄືແຜນການ ຂອງສາຍຕ່າງໆ ທີ່ໄດ້ວາງໄວ້ ເຊິ່ງຕົ້ນຕໍ ແມ່ນແນໃສ່ເພື່ອປັບປຸງ ແລະ ພັດທະນາ ການສຶກສາພາກເອກະຊົນ ເຊັ່ນ:
(1) ການໃຊ້ຈ່າຍ ໃນການຈັດຕັ້ງພິທີຕ່າງໆ:
- ສະຫຼອງວັນຄູແຫ່ງຊາດ
- ກອງປະຊຸມເຜີຍແຜ່ ຜົນຮ້າຍ ຂອງຢາເສບຕິດ
- ກອງປະຊຸມເຜີຍແຜ່ ລະບຽບການສັນຈອນ ໃນທ້ອງຖະໜົນຫຼວງ
- ການເຄື່ອນໄຫວກິດຈະກຳ ສີລະປະ ແລະ ກິລາ
- ຈັດກອງປະຊຸມໃຫຍ່ ປະຈຳປີ ສະໄໝສາມັນ ຫຼື ວິສາມັນ ຂອງສະມາຄົມ
- ການໃຊ້ຈ່າຍ ໃນພິທີສໍາຄັນອື່ນໆ.
(2) ການໃຊ້ຈ່າຍ ທາງດ້ານວິຊາການ:
- ກອງປະຊຸມແລກປ່ຽນບົດຮຽນ ດ້ານການບໍລິຫານ ຂັ້ນຜູ້ອຳນວຍການ ສະຖານການສຶກສາ ພາກເອກະຊົນ
- ກອງປະຊຸມບຳລຸງ ແລະ ຍົກລະດັບຄູ ພາກເອກະຊົນ
- ກອງປະຊຸມແລກປ່ຽນບົດຮຽນ ດ້ານການສິດສອນ ລະຫວ່າງ ຄູ ພາກເອກະຊົນ
- ການຈັດຊື້ ອຸປະກອນສິດສອນ ເພື່ອຮັບໃຊ້ການຝຶກອົບຮົມ
- ການຈັດຊື້ ປຶ້ມຕຳລາຄົ້ນຄວ້າ ເພື່ອເອົາໄວ້ເປັນຊັບສົມບັດລວມ ຂອງສະມາຄົມ
(3) ການໃຊ້ຈ່າຍດ້ານບໍລິຫານທົ່ວໄປ.
- ຄ່າພິມ ແລະ ອັດສຳເນົາ ເອກະສານຕ່າງໆທີ່ຈໍາເປັນ
- ຄ່າເຊົ່າສະຖານທີ່ຂອງສຳນັກງານ, ຄ່າໄຟຟ້າ, ຄ່ານ້ຳປະປາ, ຄ່າໂທລະສັບ, ຄ່າອິນເຕີເນັດ
- ຄ່າເງິນເດືອນພະນັກງານປະຈຳສຳນັກງານ ແລະ ຄ່າຊື້ເຄື່ອງໃຊ້ຫ້ອງການທີ່ຈຳເປັນ
- ຄ່າເຮັດປ້າຍໂຄສະນາຕ່າງໆຂອງສະມາຄົມ
- ຄ່າໃຊ້ຈ່າຍບໍລິຫານອື່ນໆ ທີ່ຈຳເປັນ
ມາດຕາ 48: ການຝາກ ແລະ ການຖອນ
ພາຍຫຼັງທີ່ສະມາຊິກສາມັນ ຂອງສະມາຄົມ ໄດ້ຈ່າຍເງິນບໍາລຸງສະມາຄົມ ຫຼື ພາຍຫຼັງທີ່ໄດ້ຮັບເງິນອຸດໜູນ ແລະ ເງິນບໍລິຈາກ ຈາກພາກສ່ວນຕ່າງໆແລ້ວ, ນາຍຄັງຈະຕ້ອງເອົາເງິນດັ່ງກ່າວ ໄປເຂົ້າບັນຊີເງິນຝາກທະນາຄານໃນນາມຂອງ ສະມາຄົມ, ແຕ່ໃນການຖອນເງິນອອກຈາກທະນາຄານ ແຕ່ລະຄັ້ງ ນາຍຄັງ ຈະຕ້ອງສົມທົບ ນາຍບັນຊີ ໂດຍອີງຕາມ ແຜນໃຊ້ຈ່າຍເງິນ ທີ່ໄດ້ອະນຸມັດເຫັນດີ ຈາກຄະນະປະຈຳ ຂອງສະມາຄົມ.
ມາດຕາ 49: ປະທານສະມາຄົມ ເປັນຜູ້ສັ່ງການດ້ານການເງິນ ຂອງສະມາຄົມ ໃນຂອບເຂດກົດລະບຽບ ຂອງສະມາຄົມ.