ໝວດທີ IV
ວ່າດ້ວຍລະບຽບການເລືອກຕັ້ງ ຄະນະບໍລິຫານງານ
ຂອງ ສະມາຄົມກນສຶກສາ ພາກເອກະຊົນ
ມາດຕາ 35: ຜູ້ມີສິດ ສະໝັກເລືອກຕັ້ງ ເປັນຄະນະບໍລິຫານງານ ຂອງ ສະມາຄົມ ການສຶກສາພາກເອກະຊົນ ຕ້ອງມີເງື່ອນໄຂດັ່ງນີ້:
(1) ຕ້ອງເປັນສະມາຊິກສາມັນ ຂອງ ສະມາຄົມ ການສຶກສາພາກເອກະຊົນ ຢ່າງຕ່ຳບໍ່ຫຼຸດ 2 ປີຂຶ້ນໄປ.
(2) ຕ້ອງມີທັດສະນະຫຼັກໝັ້ນ ທາງດ້ານການເມືອງ, ມີມະນຸດສຳພັນດີ ແລະ ມີອາຍຸບໍ່ຫຼຸດ 30 ປີຂຶ້ນໄປ.
(3) ຕ້ອງມີຄວາມຮູ້ ຄວາມສາມາດ ແລະ ປະສົບການ ທາງດ້ານ ການບໍລິຫານ ສະຖານການສຶກສາ
(4) ຕ້ອງແມ່ນຜູ້ທີ່ມີຄວາມສົນໃຈ ແລະ ເຂົ້າຮ່ວມໃນກິດຈະກໍາຕ່າງໆ ຂອງສະມາຄົມ ຢ່າງເປັນປົກກະຕິ ເຊັ່ນ ເຂົ້າຮ່ວມກອງປະຊຸມ ສຳມະນາ, ເຂົ້າຮ່ວມກິດຈະກໍາ ເພື່ອສັງຄົມ, ກິດຈະກຳ ເພື່ອການສຶກສາ ແລະ ກິດຈະກຳອື່ນໆ ທີ່ສະມາຄົມຈັດຂຶ້ນ
(5) ຕ້ອງເປັນຜູ້ທີ່ສາມາດເຕົ້າໂຮມຄວາມສາມັກຄີໄດ້ດີ
(6) ຕ້ອງແມ່ນຜູ້ທີ່ຫ້າວຫັນໃນການເຮັດວຽກ, ມີແນວຄິດສ້າງສັນ ແລະ ມີເວລາພຽງພໍໃຫ້ກັບວຽກງານ ຂອງສະມາຄົມ
(7) ຕ້ອງມີຄຸນນະທຳ ແລະ ບໍ່ເຄີຍສ້າງຄວາມເຊື່ອມເສຍ ທາງສັງຄົມມາກ່ອນ
(8) ຕ້ອງແມ່ນຜູ້ທີ່ບໍ່ເຄີຍ ສ້າງຄວາມແຕກແຍກຄວາມສາມັກຄີ ພາຍໃນສະມາຄົມ ແລະ ບໍ່ເຄີຍສ້າງຄວາມເຊື່ອມເສຍ ຕໍ່ພາບພົດ ແລະ ກຽດຊື່ສຽງ ຂອງ ສະມາຄົມ ມາກ່ອນ
(9) ຕ້ອງແມ່ນຜູ້ທີ່ມີຄວາມເສຍສະຫຼະ ແລະ ມີຜົນງານໃນການປະກອບສ່ວນ ໃນການຊ່ວຍເຫຼືອສັງຄົມ
(10) ຕ້ອງມີສຸຂະພາບຈິດ ແລະ ສຸຂະພາບກາຍດີ
ມາດຕາ 36: ຜູ້ມີສິດປ່ອນບັດເລືອກຕັ້ງ ເອົາຄະນະບໍລິຫານງານ ຂອງ ສະມາຄົມ ຕ້ອງແມ່ນ ສະມາຊິກສາມັນ ຂອງສະມາຄົມ ( ອີງຕາມ ມາດຕາ 24 ຂອງກົດລະບຽບ ສະມາຄົມ )
ມາດຕາ 37: ຈຳນວນຂອງ ຄະນະບໍລິຫານງານ ທີ່ຕ້ອງການ ແມ່ນຄັດເລືອກເອົາ ລະຫ່ວາງ 9 ຫາ 15 ຄົນເທົ່ານັ້ນ, ເຊິ່ງໃນນັ້ນ 5 ຄົນຈະຖືກເລືອກຕັ້ງເປັນຄະນະປະຈຳ ( ອີງຕາມມາດຕາທີ່ 25 ຂອງກົດລະບຽບສະມາຄົມ )
ມາດຕາ 38: ຊື່ຂອງຜູ້ສະມັກເລືອກຕັ້ງ ຈະຂຽນໃສ່ກະດານ ໂດຍອີງຕາມເລກລຽງ ເຊິ່ງໄດ້ຈາກການຈົກສະຫຼາກ. ຈາກນັ້ນຈະຢາຍບັດ ເຊິ່ງມີເລກລະຫັດຂອງຜູ້ສະໝັກແຕ່ລະຄົນ ລວມຢູ່ໃນໃບດຽວກັນ ໃຫ້ຜູ້ທີ່ມີສິດແຕ່ລະຄົນ ປ່ອນບັດຄັດເລືອກ
ມາດຕາ 39: ການປ່ອນບັດເລືອກຕັ້ງ ຈະດຳເນີນໃນຮູບແບບ ລົງຄະແນນສຽງລັບ ໂດຍໃຫ້ຜູ້ປ່ອນບັດໝາຍ ຕີນກາ (X) ຄັດອອກສະເພາະຜູ້ທີ່ບໍ່ຕ້ອງການເອົາເທົ່ານັ້ນ, ຍົກຕົວຢ່າງຖ້າມີຜູ້ສະໝັກເລືອກຕັ້ງ 17 ຄົນ, ທ່ານມີສິດໝາຍ 2 ຄົນ, ຖ້າບໍ່ໝາຍອອກ ຫຼື ໝາຍລື່ນ ຫຼື ໝາຍຫຼຸດ 2 ຄົນ ຈະຖືວ່າບັດນັ້ນເປັນ ໂມຄະ (ບໍ່ມີຄະແນນສຽງ).
ມາດຕາ 40: ໃນກໍລະນີທີ່ມີຜູ້ສະໝັກເລືອກຕັ້ງ ບໍ່ເກີນ 15 ຄົນ (ຄືລະຫ່ວາງ 9 ຫາ 15 ຄົນ) ຈະບໍ່ຈຳເປັນເສຍເວລາເລືອກຕັ້ງພຽງແຕ່ໃຫ້ສະມາຊິກສາມັນ ໃນກອງປະຊຸມ ຊີ້ມືຮັບຮອງເອົາ ໂດຍໃຫ້ມີສຽງກາຍ 2/3 ຂອງ ຈຳນວນສະມາສາມັນທັງໝົດ ທີ່ມາປະຊຸມ.
ມາດຕາ 41: ພາຍຫຼັງບ່ອນບັດເລືອກຕັ້ງແລ້ວ ຕ້ອງມີການນັບຄະແນນສຽງ ຕໍ່ໜ້າກອງປະຊຸມແບບເປີດເຜີຍ. ຜູ້ທີ່ມີຄະແນນສຽງ ຄັດເລືອກອອກຫຼາຍກ່ວາໝູ່ຖືວ່າບໍ່ໄດ້ຮັບການເລືອກຕັ້ງ. ຜູ້ທີ່ຖືວ່າ ໄດ້ຮັບການເລືອກຕັ້ງ ຈະຕ້ອງແມ່ນຜູ້ທີ່ມີຄະແນນສຽງຄັດອອກ ນ້ອຍກ່ວາໝູ່ ຄືລະຫ່ວາງ ຜູ້ທີ່ 1 ຫາທີ 15.
ມາດຕາ 42: ໃນກໍລະນີ ທີ່ຜູ້ໄດ້ຄະແນນສຽງຄັດອອກ ຜູ້ທີ່ 15 ມີສຽງສະເໜີກັນ 2 ຄົນ ຫຼື ຫຼາຍກ່ວານັ້ນ ຈະຕ້ອງລົງຄະແນນຄັດເລືອກໃໝ່ເອົາ 1 ຄົນເທົ່ານັ້ນ.
ມາດຕາ 43: ໃນຈໍານວນຜູ້ບໍລິຫານງານ ທີ່ໄດ້ຮັບການເລືອກຕັ້ງແລ້ວ ຖ້າມີນ້ອຍກ່ວາ 9 ຄົນລົງມາ ຄະນະປະຈຳ ຈະເປີດປະຊຸມ ເລືອກຕັ້ງຕື່ມອີກ ໃນຂັ້ນຕໍ່ໄປ ເພື່ອໃຫ້ໄດ້ຈໍານວນພຽງພໍ ກັບຄວາມຕ້ອງການ ໃນການບໍລິຫານສະມາຄົມ.